Freed 8 april 20.00 oere yn de Bidler Wergea

It famke en de twiveler is basearre op Two for the Seesaw, in Broadwayklassiker oer de leafde. Lourens van den Akker en Ali Zijlstra stappe yn de spoaren fan Robert Mitchum en Shirley MacLaine, dy’t de rollen spilen fan twa minsken sykjend nei leafde en hâldfêst. Hy hat brutsen mei syn leafde en beslút nei de stêd te gean om ôfstân te nimmen fan syn thússitewaasje. Dêr moetet hy har. Sy besiket, krekt as hy, op ’e nij foarm te jaan oan har libben. Se fiele har sterk ta mekoar oanlutsen. Is harren leafde in middel om de iensumheid te ferdriuwen of is it echt?

Foar regisseur Tatiana Pratley (Heimwee nei Hurdegaryp) fielt it stik as in yntinse stúdzje fan wat leafde is. De twa personaazjes rinne alle stadia fan in alles oerhearskjende leafde troch: fan de earste moeting en it ôftaasten oft de oar dy wol wol, oant de ferlieding, de oerjefte, de earste barsten dy’t komme en de muoite dy’t it kostet om dysels en de oar te akseptearjen sa’t hy of sy is.

It famke en de twiveler is in fassinearjende, eigenwize remake troch jonge teatermakkers, dy’t de sfear fan de jierren ’50 subtyl rekket.

Entree: € 14,00 p.p.  (freonen of 65+ :  € 12,50 p.p.)
Kaarten reservearje op:
http://www.kulturelekommisjewergea.nl/site/?page_id=29
of op tillefoannummer 058-2552657 (Anita van der Meer)

Theo Smedes yn teatermonolooch Jimmy Costello.
Freed 12 february om 20.00 oere yn de Bidler Wergea.

 Yn 2016 giet Theo Smedes (bekend fan De Emigrant) solo yn de foarstelling Jimmy Costello, in ferhaal dat him ôfspilet yn Nij-Seelân yn de jierren ’50. Jimmy is in autodief dy’t syn karriêre ûnskuldich begjint mei it stellen fan molkejild, mar troch syn lettere dieden meardere kearen yn ‘e finzenis belânet én ûntsnapt. Hy wit dêrmei dagen oant wiken út de hannen fan de plysje te bliuwen en kriget dêrtroch de sympaty fan it folk, mar just troch syn heldestatus stiet him úteinlik in swiere straf te wachtsjen.

Jimmy Costello is in Frysktalige teatermonolooch dy’t oarspronklik skreaun is troch de Nij-Seelânse skriuwer Tim Balme en basearre is op wiere feiten. Yn dizze foarstelling nimt de betsjutting fan frijheid en it ûntflechtsjen fan ferantwurdlikens in sintraal plak yn. Hoe fier kin immen gean yn it nimmen fan frijheden en hoe reagearret it kollektyf hjirop?

Kaarten te bestellen op:
www.kulturelekommisjewergea.nl
Tillefoannummer 058- 2552342 (Jitze)
Kosten € 14,00 (ynklusyf in konsumpsje)
Oant sjen.

De Kulturele Kommisje Wergea